Lesotho: Semonkong Kinderhuis
Jaco van Vuuren
Naby die Maletsunyane-waterval is die Semonkong kinderhuis, wat reeds in 2006 gestig is om na weeskinders om te sien.
Nagenoeg 45 kinders word deur ses mense versorg. Die span werk dag en nag om na die behoeftes van die kinders om te sien. Ons poog om skoolvakansies die span te gaan ondersteun. Ons doel is om verhoudings te bou met die personeel en liefde te wys aan die kinders deur baie met hulle te speel en aktiwiteite met hulle te doen.
Hulle hoofborgskap het in 2017 tot ’n einde gekom en dit is behoorlik ’n geskarrel om die wa deur die drif te trek.
Bergsig is sedert 2015 betrokke by die opgradering van die kinderhuiseiendomme. Die omskepping van ’n leë huis vir “backpackers”, waarmee ons gehelp het, bring nou heelwat waardevolle fondse vir hulle in. Kom spandeer gerus jou vakansie hier.
Verder is daar met die hulp van die Snymans (Love Lesotho Ministries) uitstekende oeste gelewer deur landerye wat Bergsig verbou het. Daar is na raming genoeg kool, spinasie en ertjies vir al die kinders vir die jaar en genoeg voer vir hulle diere. So leer en help ons hulle om selfstandig te wees. Hier kan jy werklik jou bydrae sien groei.
Gesinne is ook welkom om op hulle eie te gaan. Neem ’n dag om die natuur te beskou tydens ’n asemrowende staproete na die Maletsunyane-waterval. Daar is ook geleentheid om op die Basoeto-ponies te ry. Oornag in ’n huis met krag, lopende vars water, ’n spoeltoilet, bad en stort. Beddens en beddegoed word verskaf vir die 3 kamers met 1 x dubbelbed en nog 8 enkelbeddens. ’n Yskas, mikrogolf en gasstoof asook genoeg breekware en eetgerei is beskikbaar. Dis heelpad teerpad soontoe.
Mosambiek: Evangelisasie
Sedert 1994 is NG Kerk Bergsig, saam met NG Kerk Helderberg, op verskeie gebiede betrokke in Mosambiek; aanvanklik deur die stuur van Suid-Afrikaanse sendelinge en tans deur ondersteuning en opleiding van pastore in die Igreja Reformada EM Mocambique (Sinode van die Gereformeerde Kerk in Mosambiek).
Namate die IRM volwassenheid bereik het, het die tyd aangebreek om op eie bene te staan. Dit is in 2017 verwesenlik toe die IRM vir die eerste keer sy eie pastore na onbereikte Moslem-gebiede in die noordelike provinsies van Mosambiek uitgestuur het.
Bergsig is verantwoordelik vir die salaris sowel as die bedienings uitgawes van een van dié pastore – pastoor Ganhali van die Mavago gemeente. Bergsig het hierdie gemeente bygestaan om ‘n doelmatige kerkgebou op te rig wat die nuut gevestigde Christen skool huisves. Tesame met die uitdaging van werk in ’n hoofsaaklik Moslem-kultuur, is daar malaria en elke denkbare tropiese siekte wat teengestaan moet word en steier hulle gereeld onder droogtes en jaarlikse siklone.
Bergsig is verder verantwoordelik vir die salarisse van pastore Goliate, Cincoreis en Adolpho, in die Milange area.
Die bykans 90 Bergsig gemeentelede wat al saam was op ‘n Mosambiek uitreik, getuig van wonderlike geestelike belewenisse tydens besoeke aan die IRM, pastore en hul gemeentes.
Mosambiek: Makwe
Bergsig ondersteun ook vir André en Anna-Marie Thiart in Quionga, naby die Ruvumarivier, wat die grens is tussen Mosambiek en Tanzanië.
Hulle is die afgelope 17 jaar betrokke by die bediening aan die Makwes – ’n unieke groep van ongeveer 30 000 inwoners in die streek (5 000 in Quionga). André is ook nou betrokke by ondersteuning van die pastore wat deur die IRM uitgestuur is.
’n Kleuterskoolbehoefte is geïdentifiseer as die beste metode van uitreik na die gemeenskap – deur die kinders na die ouers. Moslem-ouers in daardie area het geen probleem om hul kinders na ’n Christenskool te stuur nie.
Bly asseblief bid vir die bedieningswerk wat hier deur André en Anna-Marie gedoen word. Finansiële ondersteuning is natuurlik ook deurgaans nodig.
Duitsland: Operasie Mobilisasie: Menges-Gesin
Tobias en Sandra Menges woon in Korntal, Duitsland– naby Stuttgart.
Tobias is verantwoordelik vir die opleiding van Duitse sendelinge wat wêreldwyd werk. Sendelinge wat alreeds in die veld is, studeer deeltyds by Columbia International University, Korntal, om sodoende meer effektief in hulle diens te wees. Die kursus gee ’n kans om terug te staan, te reflekteer en nuut toegerus en gemotiveer te word vir dit waarvoor hulle geroep is.
Sandra is ‘n interkulturele lewensafrigter en spesialisberader in die hantering van krisisse. Sy begelei sendelinge wêreldwyd om hulle te help om op ‘n emosioneel gesonde plek te bly sodat hulle meer effektief in hulle diens is. Sy lei ook mense wêreldwyd op om soortgelyke werk te kan doen. Hulle het drie volwasse dogters, elkeen met ‘n hart vir die bediening van Jesus se liefde aan mense.
Operasie Mobilisasie het Tobias gesekondeer aan CIU Korntal. Sandra werk deeltyds vir OM en ander organisasies. Durbanville-Bergsig het die voorreg om ook op hierdie manier “… te gaan na alle nasies (Mat. 28:19) … tot aan die uithoeke van die wêreld.” (Hand. 1:8).
Tobias is betrokke by die konsep-ontwerp, en lei die akademiese afdeling van die Bybelskool. Hy bied ook kursusse aan en begelei die studente in studieprojekte in hulle diens. Na-ure is hy ’n mentor/begeleier vir jonger mans, vlugtelinge en sendingleiers.
Oekraïne: Shanna Visagie en Volodya Brychuk
Bergsig Koördineerder:
Shanna Visagie is ‘n sanger, motiveringspreker en sendeling vanuit Melkbosstrand, Kaapstad. Shanna is verskeie tale magtig, o.a. Duits en Oekraїnies (bo en behalwe Afrikaans en Engels natuurlik), en gebruik haar gawes voluit in diens van die Here. In 2024 het sy ook ‘n boek geskryf en uitgegee.
Haar paaie het met Joseph en Olesia Todikash (sien Oekraïne: The House of Prayer to all Nations”) gekruis terwyl sy by INcontext International gewerk het. Sy het bykans 2 jaar in Rakhiv in Oekraїne gewoon en gewerk.
As gevolg van familie-omstandighede tuis en die oorlog daar het Vader haar gelei om na SA vir ‘n tydjie terug te keer, waartydens sy steeds baie betrokke was by haar geestelike familie in Oekraїne, veral ten opsigte van geestelike en emosionele steun gedurende hulle huidige traumatiese ervarings met die oorlog.
Daarna het Shanna vir 15 maande in Duitsland gaan werk om Oekraїniese vlugtelinge in Hamburg te gaan ondersteun. Sy het in dié tyd leiers bemagtig om daardie bediening by haar oor te neem, en keer einde Mei 2024 terug na Suid-Afrika.
In 2024 gaan sy vanuit Suid-Afrika voort om – aanlyn – die Oekraїniërs wat die Here al oor haar pad gebring het, te ondersteun, waarna sy graag wil terugkeer na Oekraїne om daar saam met haar verloofde, Vlad (‘n Oekraїniër) in die Here se diens te staan.
Volodya en Oksana Brychuk:
Bergsig is vanaf 2023 betrokke by pastoor Volodya Brychuk in Rivne, Oekraїne. Hy is getroud met Oksana, en hulle het 2 seuns en 2 dogters.
Volodya is pastoor by ’n Baptiste gemeente in Rivne, ‘n groot dorp in die weste van Oekraïne, en is ook daarmee saam werksaam by Mission Without Borders (wat fokus op die holistiese versorging – geestelik, emosioneel, medies, maatskaplik, materieel – van kinderhuiskinders, asook arm kinders en families in die gemeenskap).
Die oorlog in Oekraine het meegebring dat die helfte van sy gemeente, ook sy eie vrou en dogters met tye, na Pole gevlug het.
Baie families is deur die oorlog van mekaar geskei, baie moes alles agterlaat en te voet vlug. Diegene wat na Poland vlug, beweeg deur Rivne en word deur Volodya en sy gemeentelede emosioneel, geestelik en met kos en voorrade gehelp op hul pad.
Tussendeur fokus Volodya daarop om op allerlei maniere die evangelie aan sy gemeentelede, mense in die gemeenskap, en aan die vlugtelinge te verkondig. Bid asseblief vir hierdie mooi land en sy mense, en diegene soos Volodya wat volhard in hul diensbaarheid en die uitlewing van hul Christenskap in baie moeilike en lewensgevaarlike omstandighede.
Oekraïne: The House of Prayer to all Nations
The House of Prayer to all Nations is ’n gemeente in Rakhiv, Wes-Oekraïne. Joseph en Olesia Todikash is sedert 2019 die voltydse bedieningspaar by die gemeente.
Joseph het vir ’n hele klompie jare saam met Vadim, wat deur Bergsiggemeente ondersteun is, gewerk totdat hy gereed was om die gemeente oor te neem. Joseph en Olesia het ’n seun, Mark (12 jaar), en dogter, Esther (8 jaar).
Hulle is ook in die proses om die 3-jarige Lukas aan te neem. Lukas se ma was ’n enkelouer en na haar afsterwe is hy wees gelaat. Lukas noem Joseph en Olesia reeds pappa en mamma onderskeidelik. Hulle is baie geliefd in die gemeente en gemeenskap en verrig baie goeie werk.
Bedieningsmodel
Hierdie klein Protestantse gemeente in die middelpunt van Europa funksioneer reeds sedert die middel 1990’s. In diverse godsdiensomstandighede is dit uiters belangrik vir gelowige Christene om hulle getuienis prakties uit te leef by wyse van ’n volgehoue Christelike leefstyl (leefstyl-evangelisasie) om so ’n verskil te maak en ’n bydrae te lewer tot die uitbreiding van God se koninkryk. Bo en behalwe hierdie leefstylbeginsel is daar ook ’n meer gestruktureerde bedieningswyse wat ’n geestelike tuiste bied vir Christengelowiges en nuwe bekeerlinge.
Thailand: (Frontida Outreach) – André en Marina Olivier
André en Marina Olivier is al meer as 10 jaar voltyds werksaam in Thailand. Hulle bedien in Pratchuap Khiri Khan Provinsie wat grens aan die Sentrale en Suidelike streke van Thailand.
Hulle verkondig die Ware Evangelie van Jesus Christus aan onbereikte volke groepe in die Buddistiese geloofsgemeenskappe in hulle provinsie en wyer Thailand. Immoraliteit, prostitusie, mensehandel, afgod’s aanbidding en geen wete of kennis van God is aan die orde van die dag.
Die bediening het al eksponensieel gegroei oor die afgelope meer as 10 jaar en die resultate en getuienisse van Heilige Gees se werking in ‘n donker wêreld is niks anders as gelooflike nuus nie. Hulle staan tans in werksvennootskap met ’Hua Hin Full Gospel Church’ wat ook alreeds 3 ander susterskerke geplant het. Daar word ook uitgereik na ander kerke in die provinsie om interaksie te hê in terme van dissipelmaking om ten einde die kleiner kerkies te help sodat Thai Christen gemeenskappe die ongelowiges meer effektief kan bedien.
André en Marina se bediening bestaan uit:
– Aanbied van dissipelmaking opleiding.
– Sending uitreike na wyer dele van Pratchuap Khiri Khan Provinsie.
– Ondersteuning aksies aan Thai Christene in terme van klein groepe, gebedsbediening, lof en aanbiddings aande, vertalingswerk van Christelike materiaal en barmhartigheid.
– Die uitleef van Christen waardes teenoor die onmiddelike gemeenskap, plaaslike rolspelers en gemeenskapleiers.
– Hantering van eredienste by verskeie kerke in die provinsie.
Hulle kontakbesonderhede is:
+66 95 048 6080 (Whatsapp)
e-pos: frontidaoutreach@gmail.com
en ook op Facebook – Frontida Outreach
Pos adres:
Chaikao Mountain Home,
100/219 Soi 6, Boh Fai,
Hua Hin Thailand 77110
INcontext International
Lukas 12: 54-56:
Jesus het ook vir die skare gesê: “As julle ’n wolk in die weste sien opkom, sê julle dadelik: ‘Dit gaan reën!’ en dit gebeur ook. 55En as die suidewind waai, sê julle: ‘Dit gaan warm word!’ en dit word warm. 56Huigelaars! Julle weet hoe om die voorkoms van die aarde en die lug te beoordeel. Hoe is dit dan dat julle nie weet hoe om hierdie tyd te beoordeel nie?”
Die afgelope dekade het die wêreld drastiese veranderinge ondergaan, soos die oorlog in die Midde-Ooste wat die hele wêreld letterlik op sy kop gedraai het. Dis vanuit ’n wêreldse perspektief ’n tyd van chaos, maar vanuit ’n Bybelse konteks seker die opwindendste tyd wat die Kerk nog gesien het as dit kom by hoeveel Moslems tot bekering kom. Statistieke wys dat daar die afgelope 10 jaar meer Moslems tot bekering gekom het as die vorige 1 500 jaar!
Ons vind ook iets van hierdie geestelike ontwaking in vele Hindoe- en Boeddhistiese lande. Ek onthou hoe ons die kerk in Bhoetan besoek het en daar 75 nuwe kerkleiers in die amp as predikant bevestig is tydens ’n byeenkoms. Almal van hulle was voorheen Boeddhiste of Hindoes en ook selfs priesters in daardie gelowe. Om met ons eie oë te kon sien hoe die eerste generasie gelowiges in Bhoetan te werk gaan om die evangelie te versprei onder die leiding van die Gees, was iets wonderliks. Lande soos Bhoetan wat voorheen totaal gesluit was vir die evangelie, is deur die Gees van God binnegedring met die Bybelse boodskap van hoop en vandag vind jy in daardie lande ’n gesonde kerk ten spyte van die vervolging wat daar plaasvind. Nepal, Bangladesj en Indonesië is net nog voorbeelde hiervan.
‘n Nuwe seisoen wat tans beleef word, is die gevolge van die Korona-virus wat steeds wêreldwyd ervaar word. Asook die konflik tussen Rusland en Oekraïne, en Israel en Gasa. Dit kan voorkom asof die Here beheer verloor het, maar ons weet dat die Skrif vir ons sê dat Hy alles ten goede laat meewerk vir dié wat Hom liefhet. Om dit te verstaan moet ons vra wat die Here van ons in hierdie seisoen verwag. Wie weet hoe hierdie seisoen verder sal ontvou? Die Here sal dit egter gebruik ten einde sy koninkryk nog verder te vestig voor Jesus se koms.
INcontext help graag gelowiges om die seisoen waarin ons leef te identifiseer en te sien watter geleenthede daar is, sodat ons deel kan hê aan die verspreiding van die evangelie, veral onder diegene wat moeilik bereikbaar is met die Woord. Matteus 24:14 sê dan ook: “En hierdie evangelie van die koninkryk sal in die hele wêreld verkondig word, sodat al die nasies die getuienis kan hoor. Eers dan sal die einde kom.”